سچ اور سچائی کے متعلق اشعار

اس موضوع میں ہم سچ اور سچائی کے متعلق اشعار جمع کریں گے ۔ آپ بھی اپنا انتخاب شریک کیجیے ۔


پہلا شعر :

یہ معجزہ ہے کہ دنیا میں ایک بھی سچ کو

ہزار جھوٹ کا لشکر دبا نہیں سکتا

شاعر: مراق مرزا ​

 

جزاک اللہ خیرا

 

میں سچ کہوں گی مگر پھر بھی ہار جاؤں گی
وہ جھوٹ بولے گا، اورلا جواب کر دے گا

پروین شاکر
​

 

مجھے یقین تھا کہ پروین کا یہ شعر ضرور آئے گا ۔

 

کھلا ہے جھوٹ کا بازار ، آؤ سچ بولیں
نہ ہو بلا سے خریدار ، آؤ سچ بولیں

سکوت چھایا ہے انسانیت کی قدروں پر
یہی ہے موقع اظہار ، آؤ سچ بولیں

ہمیں گواہ بنایا ہے وقت نے اپنا
بنامِ عظمت کردار ، آؤ سچ بولیں

سنا ہے وقت کا حاکم بڑا ہی منصف ہے
پکار کر سرِ دربار ، آؤ سچ بولیں

جو وصف ہم میں نہیں کیوں کریں کسی میں تلاش
اگر ضمیر ہے بیدار ، آؤ سچ بولیں

چھپائے سے کہیں چھپتے ہیں داغ چہروں کے
نظر ہے آئینہ بردار ، آؤ سچ بولیں

قتیل جن پہ سدا پتھروں کو پیار آیا
کدھر گئے وہ گنہ گار، آؤ سچ بولیں


قتیل شفائی

​

 

سچ بولتے بولتے سو پوسٹس ہو گئیں ۔

 

واقعی میں نے غور نہی کیا کہ یہ میری سوویں پوسٹ تھی.
مجھے مبارک ہو
اور اسی خوشی میں سچ پر ایک اور شعر پیش خدمت ہے

سچ کہاں لکھے گا میرے دور کا تاریخ دان
جب وہ اپنا پیٹ بھرتا ہے کہانی بیچ کر

 

سچ کے عنوان سے ذہن میں سب سے پہلا شعر پروین شاکر کا ہی آتا ہے۔ یا تو یہ والا یا پھر

"بات تو سچ ہے مگر بات ہے رسوائی کی"

والا

 

بہت خوب

 

دل تجھے ناز ہے جس شخص کی دلداری پر​
دیکھ اب وہ بھی اُتر آیا اداکاری پر​
​
میں نے دشمن کو جگایا تو بہت تھا لیکن​
احتجاجاً نہیں جاگا مری بیداری پر​
​
آدمی، آدمی کو کھائے چلا جاتا ہے​
کچھ تو تحقیق کرو اس نئی بیماری پر​
​
کبھی اِس جرم پہ سر کاٹ دئے جاتے تھے​
اب تو انعام دیا جاتا ہے غدّاری پر​
​
تیری قربت کا نشہ ٹوٹ رہا ہے مجھ میں​
اس قدر سہل نہ ہو تو مری دشواری پر​
​
مجھ میں یوں تازہ ملاقات کے موسم جاگے​
آئینہ ہنسنے لگا ہے مری تیاری پر​
​
کوئی دیکھے بھرے بازار کی ویرانی کو​
کچھ نہ کچھ مفت ہے ہر شے کی خریداری پر​
​
بس یہی وقت ہے سچ منہ سے نکل جانے دو​
لوگ اُتر آئے ہیں ظالم کی طرف داری پر​


شاعر :سلیم کوثر
​​

 

بہت ہی اعلیٰ.۔۔۔۔۔ لاجواب ​

 

بہت خوب

 

کچھ لوگ جو خاموش ہیں یہ سوچ رہے ہیں
سچ بولیں گے جب سچ کے ذرا دام بڑھیں گے
شاعر: کمال صدیقی​

 

صادق ہوں اپنے قول کا غالب خدا گواہ
کہتا ہوں سچ کہ جھوٹ کی عادت نہیں مجھے​

شاعر: مرزا غالب​

 

ماشاء ﷲ

 

راحت اندوری کی ایک غزل
جھوٹوں نے جھوٹوں سے کہا ہے سچ بولو
سرکاری اعلان ہوا ہے سچ بولو
گھر کے اندر جھوٹوں کی ایک منڈی ہے
دروازے پر لکھا ہوا ہے سچ بولو
گلدستے پر یکجہتی لکھ رکھا ہے
گلدستے کے اندر کیا ہے سچ بولو
گنگا میا ڈوبنے والے اپنے تھے
ناؤ میں کس نے چھید کیا ہے سچ بولو

 

سچ کے لیے جان دینا بھی کوئی مشکل ہے؟؟
ہاں مگر تمہیں میرے جھوٹ سنبھالنا پڑیں گے

 

جھوٹ کے بوسے سے
سچ کا تھپڑ بہتر ہے

 

سچ کی تبلیغ کر رہے تھے جو
جھوٹ اُن کے رُلا گئے ہیں مجھے
نوشین علی