جامعہ محمدیہ گوجرانوالہ کا مختصر تعارف

جامعہ محمدیہ کا مختصر تعارف​

جامعہ محمدیہ کا قیام 1921ء میں عمل میں آیا۔ گوجرانوالہ چوک نیائیں میں شیخ الحدیث حضرت مولانا محمد اسماعیل صاحب نے اس کا اجراء کیا۔ محدث ومحقق حضرت مولانا محمد گوندلوی نے جامعہ محمدیہ میں بطور معلم اپنی خدمات سرانجام دیں۔ 1968ء تک شیخ الحدیث حضرت مولانا محمد اسماعیل سلفی نے اپنی بھرپور توجہ، لگن اور محنت شاقہ سے جامعہ محمدیہ کی آبیاری فرمائی۔ ان کی وفات کے بعد انتظامیہ جامعہ محمدیہ نے جید عالم دین شیخ الحدیث حضرت مولانا محمد عبداللہ صاحب کی خدمات جامعہ محمدیہ کےلیے حاصل کیں، جو اس وقت جامع مسجد دال بازار میں درس وتدریس اور تبلیغ کے فرائض سرانجام دے رہے تھے۔ حضرت مولانا عبداللہ صاحب نے جامعہ محمدیہ میں تعلیم حاصل کی تھی۔ اور شیخ الکل حافظ محمد گوندلوی اور مولانا محمد اسماعیل سلفی صاحب نے علمی فیض حاصل کیا تھا۔ حضرت مولانا محمد عبداللہ نے 1968ء سے اپنی وفات تک جامعہ محمدیہ کے مہتمم کے منصب کی ذمہ داری نبھائی۔ ان کے خصوصی معاونین شیخ الحدیث حضرت مولانا عبدالحمید صاحب ہزاروی صدر مدرس، حافظ عبدالمنان نور پوری ، مولانا جمعہ خان صاحب، مولانا محمد رفیق سلفی صاحب کی اور دیگر اساتذہ کرام وانتظامیہ جامعہ محمدیہ کی مشترکہ کوششوں ومحنت شاقہ سے اور اپنے اپنے فرائض منصبی کو دیانت دارانہ طور پر ادائیگی سے آج جامعہ محمدیہ بفضل تعالیٰ دنیا بھر کے مسلک اہلحدیث کے پیروکاروں کا ایک عظیم الشان مسلکی ادارہ کا مقام حاصل کرچکا ہے۔ حضرت مولانا محمد عبداللہ صاحب کی وفات کے بعد شیخ الحدیث حضرت مولانا عبدالحمید صاحب ہزاروی نے حسب سابق اپنی عالمانہ محققانہ کاوشوں سے جامعہ محمدیہ کے جملہ امور کو اعلیٰ معیار کے مطابق جاری وساری رکھا ہوا ہے۔
حضرت شیخ الحدیث مولانا محمد عبداللہ صاحب کی وفات کے بعد جامع مسجد چوک اہلحدیث میں مولانا کی دوران علالت ان کی اجازت سے حافظ عبدالمنان نور پوری صاحب خطابت اور درس قرآن وحدیث ارشاد فرمارہے ہیں۔ اور جامعہ محمدیہ میں بخاری شریف بھی حافظ عبدالمنان صاحب پڑھا رہے ہیں۔ جامعہ محمدیہ سے ہر سال تقریباً اسی (۸۰) کے قریب علماء فارغ التحصیل ہورہے ہیں۔ آج تک ہزاروں کی تعداد میں جامعہ محمدیہ سے فارغ ہوکر علمائے کرام پوری دنیا میں تبلیغی وتدریسی ، تالیفی وتصنیفی خدمات سرانجام دے رہے ہیں۔

بحوالہ مرآۃ البخاری، ص: 14
کمپوزنگ: آزاد​

 

ماشاءاللہ