مگر مچھ کی کھال سے بنی اشیاء

مگر مچھ ایک حرام جانور ہے اور حرام جانور سے کسی بھی قسم کا انتفاع حرام ہوتا ہے , الا کہ کسی خاص انتفاع کی کوئی دلیل موجود ہو ۔ لہذا مگرمچھ اور اسکی کھال سے بنی اشیاء کا استعمال شرعا ممنوع ہے ۔
۱۔ اسکی قدرے وضاحت کر چکا ہوں , اور اس پر دلیل کہ جو چیز حرام ہو اس سے کسی بھی طور فائدہ اٹھانا حرام ہوتا ہے , نبی کریم صلى اللہ علیہ وسلم کا فرمان ہے کہ : اللہ تعالى کی یہودیوں پر لعنت ہو جب اللہ نے ان پر چربی کو حرام کیا تو انہوں نے اسے پگھلایا اور اسے بیچا اور اسکی قیمت کھانے لگ گئے ۔ (صحیح بخاری:۲۲۲۳,۲۲۲۴) ۔ یعنی چربی کو کھانا حرام تھا تو چربی کو استعمال کرنا اسے بیچنا بھی اسے خریدنا بھی حرام تھا , لیکن انہوں نے کھانے سے تو پرہیز کر لیا مگر اسے گھی بنا کر لوگوں کو فروخت کرنا شروع کر دیا ۔ اس وجہ سے نبی صلى اللہ علیہ وسلم ان پر لعنت فرما رہے ہیں ۔ اس سے ثابت ہوتا ہے کہ حرام جانور کا صرف کھانا ہی حرام نہیں بلکہ اس کے جسم کے کسی بھی حصہ سے کسی بھی قسم کا فائدہ اٹھانا حرام ہوتا ہے ۔
ہاں بعض حرام جانوروں سے فائدہ اٹھانے کی شریعت نے رخصت دی ہے , مثلا: کتا , اسے سکھلا کر اس سے شکار کروانا , مویشیوں یا کھیتی کی حفاظت کے لیے رکھنا شریعت نے جائز قرار دیا ہے ۔ اسی طرح : گدھا, اس پر سواری کرنا بوجھ لادنا اسلام نے مباح رکھا ہے , اور اس طرح دیگر بھی کچھ جانور ہیں جن سے مخصوص قسم کا فائدہ اٹھانے کی کتاب وسنت میں واضح دلیلیں موجود ہیں ۔
۲۔ کسی بھی حرام جانور کی کھال دباغت سے پاک نہیں ہوتی , نبی کریم صلى اللہ علیہ وسلم نے صرف اورصرف "إھاب" کے بارہ میں فرمایا ہے کہ دباغت سے وہ پاک ہو جاتی ہے ۔ اور لفظ "اہاب" حلال جانوروں کے چمڑے پر بولا جاتا ہے ۔ حرام جانوروں کے چمڑے کو "اہاب" نہیں بلکہ "جلد" وغیرہ کہتے ہیں ۔ لفظ اہاب کا یہ ترجمہ لغت عرب کی معروف کتابوں مثلا لسان العرب وغیرہ میں موجود ہے ۔
۳۔ مگر مچھ کے نوکیلے دانت کیا کسی کو دکھائی نہیں دیتے ؟؟؟ حدیث میں تو ہر نوکیلے دانت والا جانور (ذی ناب من السباع) حرام قرار دیا گیا ۔ جبکہ مگر مچھ کے کی دانت ذی ناب (کچلی والے) ہوتے ہیں , جو کہ اسکے سخت حرام ہونے کی دلیل ہیں ۔
فتدبر !