کلام صفی :: متاع قلب و نظر

ابن صفی مرحوم
نے جاسوسی ناول لکھنے سے قبل ، اسرار ناروی کے نام سے شاعری بھی کی تھی اور ان کی شاعری اس قدر متاثر کن تھی کہ بقول خود ان کے ، ان کے ایک بزرگ استاد ، ابن صفی کے جاسوسی ناول نویس بننے پر سدا ان سے ناراض رہے۔

ابن صفی کے اس خاص گوشے میں ہم اسرار ناروی کا منتخب کلام پیش کریں گے۔

جو کہہ گئے وہی ٹھہرا ہمارا فن اسرار
جو کہہ نہ پائے ، نہ جانے وہ چیز کیا ہوتی​

 

کبھی قاتل ، کبھی جینے کا چلن ہوتی ہے

کبھی قاتل ، کبھی جینے کا چلن ہوتی ہے
ہائے کیا چیز یہ سینے کی جلن ہوتی ہے

چھیڑیے قصۂ اغیار ہی ، ہم سن لیں گے
کچھ تو کہئے کہ خموشی سے گھٹن ہوتی ہے

یادِ ماضی ہے کہ نیزے کی اَنّی کیا کہئے؟
ذہن میں ایسی چبھن ، ایسی چبھن ہوتی ہے

پھول کھلتے ہی چمن آنکھ سے اوجھل ہو کر
ڈھونڈتا ہے اسے جو رشکِ چمن ہوتی ہے

کتنی ہی زہر میں ڈوبی ہوئی رکھتی ہو زباں
پھر بھی وہ نازشِ گل غنچہ دہن ہوتی ہے​

 

ہمی جانے کس منہ سے آئے یہاں تک
ہوا کیا ، اگر آپ نے بے رخی کی
غزل بن گئی زینتِ بزمِ عشرت
غزل گو نے افلاس میں خودکشی کی​

 

التجا

التجا
بحضور سرورِ کائینات (صلی اللہ علیہ وسلم)

میرے آقا ! میں کس منہ سے در پر ترے حاضری دوں
میرے ماتھے پہ اب تک نشانِ عبادت نہیں
ایک بھی نیک عادت نہیں
میری جھولی گناہوں سے پُر ہے
میرے ہاتھوں کی آلودگی باعثِ شرم و غیرت بنی
میرے آقا ! میں کس منہ سے در پر ترے حاضری دوں؟
پھر بھی آقا مرے ! پھر بھی مولا مرے !
تیرے در کے سوا اور جاؤں کہاں
ہو اجازت مجھے حاضری کی عطا
میرے آقا ! میں نادم ہوں اپنی بد عادات پر​

 

ماں

ابن صفی نے اپنی والدہ کے انتقال پر درج ذیل آزاد نظم لکھی تھی اور اپنی والدہ کے انتقال کے چودہ ماہ بعد خود بھی انتقال کر گئے !

ایک بچہ
اپنی ماں سے بچھڑ گیا ہے
اس میلے میں
اب کیا ہوگا؟
کون اسے گھر لے جائے گا؟
حیراں حیراں دیکھ رہا ہے
چاروں طرف چہرے ہی چہرے
دھندلے چہرے
کیا یہ ، اُس کو پہچانیں گے
کیا یہ ، اُسے گھر تک پہنچا دیں گے؟
کوئی نہیں
سب اَن دیکھے ، اَن جانے ہیں
سہما سہما چیخ رہا ہے
ماں !
ماں !!
ماں !!!

 

ابنِ صفی محترم کی ایک غزل۔۔

ذہن سے دل کا بار اترا ہے
پیرہن تار تار اترا ہے

ڈوب جانے کی لذّتیں مت پوچھ
کون ایسے میں‌ پار اترا ہے

ترک مئے کرکے بھی بہت پچھتائے
مدّتوں میں‌ خمار اترا ہے

دیکھ کر میرا دشتِ تنہائی
رنگِ روئے بہار اترا ہے

پچھلی شب چاند میرے ساغرمیں
پے بہ پے بار بار اترا ہے۔۔​

 

کچھ تو تعلق ، کچھ تو لگاؤ

کچھ تو تعلق ، کچھ تو لگاؤ
میرے دشمن ہی کہلاؤ

دل سا کھلونا ہاتھ آیا ہے
کھیلو ، توڑو ، جی بہلاؤ

کل اغیار میں بیٹھے تھے تم
ہاں ! ہاں ! کوئی بات بناؤ

کون ، ہے ہم سا چاہنے والا
اتنا بھی اب دل نہ دکھاؤ

(ق)
حسن تھا جب مستور حیا میں
عشق تھا خون دل کا رچاؤ

حسن بنا جب بہتی گنگا
عشق ہوا کاغذ کی ناؤ

شب بھر کتنی راتیں گزریں
حضرتِ دل اب ہوش میں آؤ​

 

یونہی وابستگی نہیں ہوتی

یونہی وابستگی نہیں ہوتی
دور سے دوستی نہیں ہوتی

جب دلوں میں غبار ہوتا ہے
ڈھنگ سے بات بھی نہیں ہوتی

چاند کا حسن بھی زمین سے ہے
چاند پر چاندنی نہیں ہوتی

جو نہ گزرے ، پَری وشوں میں کبھی
کام کی زندگی نہیں ہوتی

دن کے بھولے کو رات ڈستی ہے
شام کو واپسی نہیں ہوتی

(ق)
آدمی کیوں ہے وحشتوں کا شکار
کیوں جنوں میں کمی نہیں ہوتی

اک مرض کے ہزار ہیں نباض
پھر بھی تشخیص ہی نہیں ہوتی!​

 

کیا اس سے بڑھ کے اور بھی کوئی ہے امتحاں

کچھ بھی تو اپنے پاس نہیں جُز متاعِ دل
کیا اس سے بڑھ کے اور بھی کوئی ہے امتحاں

لکھنے کو لکھ رہے ہیں غضب کی کہانیاں
لکھی نہ جا سکی مگر اپنی ہی داستاں !

دل سے دماغ و حلقۂ عرفاں سے دار تک
ہم خود کو ڈھونڈتے ہوئے پہنچے کہاں کہاں

اس بےوفا پہ بس نہیں چلتا تو کیا ہوا ؟
اُڑتی رہیں گی اپنے گریباں کی دَھجیاں

ہم خود ہی کرتے رہتے ہیں فتنوں کی پرورش
آتی نہیں ہے کوئی بَلا ہم پہ ناگہاں​

 

لب و رخسار و جبیں سے ملیے

لب و رخسار و جبیں سے ملیے !
جی نہیں بھرتا کہیں سے ملیے

یوں نہ اُس دل کے مکیں سے ملیے
آسماں بن کے زمیں سے ملیے

گھُٹ کے رہ جاتی ہے رسوائی تک
کیا کسی پردہ نشیں سے ملیے

کیوں حرم میں یہ خیال آتا ہے؟
اب کسی دشمنِ دیں سے ملیے

جی نہ بہلے رَمِ آہو سے تو پھر
طائرِ سدرہ نشیں سے ملیے

بجھ گیا دل تو خرابی ہوئی
پھر کسی شعلہ جبیں سے ملیے

وہ حاکمِ دوراں تو نہیں !
مت ڈریں اُن کی "نہیں" سے ملیے​

 

بڑے غضب کاہے یارو' بڑے عذاب کا زخم!
اگر شباب ہی ٹھرا میرے شباب کا زخم

ذرا سی بات تھی' کچھ آسماں‌ نہ پھٹ پڑتا
مگر ہرا ہے ابھی تک تیرے جواب کا زخم

زمیں کی کوکھ ہی زخمی نہیں‌ اندھیروں‌سے
ہے آسماں کے بھی سینے پہ آفتاب کا زخم

میں‌ سنگسار جو ہوتا تو پھر بھی خوش رہتا
کھٹک رہا ہے مگر دل میں‌ اک گلاب کا زخم

اسی کی چاہ گری میں‌ گذر گئی اسرار
تمام عمر کو کافی تھا اک شباب کا زخم۔​

 

راہِ طلب میں کون کسی کا ، اپنے بھی بیگانے ہیں

راہِ طلب میں کون کسی کا ، اپنے بھی بیگانے ہیں
چاند سے مکھڑے رشکِ غزالاں سب جانے پہچانے ہیں

تنہائی سی تنہائی ہے ، کیسے کہیں ، کیسے سمجھائیں
چشم و لب و رخسار کی تہ میں روحوں کے ویرانے ہیں

اُف! یہ تلاشِ حسن و حقیقت کس جا ٹھہریں جائیں کہاں
صحنِ چمن میں پھول کھلے ہیں ، صحرا میں دیوانے ہیں

ہم کو سہارے کیا راس آئیں ، اپنا سہارا ہیں ہم آپ
خود ہی صحرا ، خود ہی دِوانے شمع نفس پروانے ہیں

بلآخر تھک ہار کے یارو ! ہم نے بھی تسلیم کیا !
اپنی ذات سے عشق ہے سچا ، باقی سب افسانے ہیں​

 

دولتِ غم اپنے ہی اوپر ہم نے خوب لٹائی

دولتِ غم اپنے ہی اوپر ہم نے خوب لٹائی
سارے جہاں میں کوئی نہ ہوگا ہم سا حاتم طائی

ہم نے کہا تھا پچھتاؤ گے جانے کیسی ساعت تھی
چھوٹے منہ سے نکلی ہوئی بھی بات بڑی کہلائی

فہم و فراست خواب کی باتیں جاگتی دنیا پاگل ہے
عقل کا سورج ماند ہوا ہے ذروں کی بن آئی

دریا کی گہرائی ناپو موتی ہاتھ لگیں گے
کیا پاؤگے ناپ کے یارو جذبے کی گہرائی

اپنی ذات میں ڈوبنے والے ٹھہریں اونچے لوگ
سب کا درد بٹانے والے کہلائیں ہرجائی

سود و زیاں کے بازاروں میں ڈھونڈ رہا تھا اپنا مول
بن بہروپ کسی نے قیمت دو کوڑی نہ لگائی​

 

بُجھی بُجھی سی ہیں قندیلِ ہائے بزمِ دماغ

نظم

بُجھی بُجھی سی ہیں قندیلِ ہائے بزمِ دماغ
فسردگی نے اُمنگوں کا ساز چھین لیا

تڑپ کے سرد ہوئی گھنگھروؤں کی نرم صدا
سیاہیوں میں ستارے سے رقص کرتے ہیں

کبھی شعور میں گھلتے کبھی اُبھرتے ہیں
کبھی فضا میں لرزتے ہیں نقرئی آنچل

کبھی زمیں پہ پھسلتے ہیں سیمگوں بادل
سیاہیاں کسی گوشے سے دوڑ آتی ہیں

تجلّیات سے ٹکرا کے لوٹ جاتی ہیں
سکوں بدوش ہے بپھرے ہوئے خیالوں کا

رُبابِ ذہن پہ ہیجان آفریں نغمہ
خلا میں ڈوب گئی نغمۂ شعور کی لَے

کہ لاشعور کے ہونٹوں پہ تھرتھری سی ہے
محال ہے کہ ملے شب میں زندگی کا سراغ​

 

آج کی رات کٹے گی کیوں کر

آج کی رات کٹے گی کیوں کر، ساز نہ جام نہ تُو مہمان
صبح تلک کیا جانئے کیا ہو ، آنکھ لگے یا جائے جان

پچھلی رات کا سناٹا کہتا ہے اب کیا آئیں گے
عقل یہ کہتی ہے سو جاؤ ، دل کہتا ہے ایک نہ مان

ملکِ طرب کے رہنے والو ، یہ کیسی مجبوری ہے
ہونٹوں کی بستی میں چراغاں ، دل کے نگر اتنے سنسان

اُن کی بانہوں کے حلقے میں عشق بنا ہے پیرِ طَریق
اب ایسے میں بتاؤ یارو کس جا کفر کدھر ایمان

ہم نہ کہیں گے آپ کے آگے رو رو دیدے کھوئے ہیں
آپ نے بپتا سن لی ہماری ، بڑا کرم ، لاکھوں احسان

 

بزرگو!کوئی حوالہ تودیتے کسی میگزین کاکتاب کایاکوئی دوسراحوالہ جس سے پتہ چلتا کہ یہ کلام ابن صفی ہے یونہی خالی خولی کلام نقل کردینے سے توبات نہیں بن جائے گی نا:00003: