ابھی تک ہم نہیں بولے

ابھی تو آپ ہیں اور آپ کا زورِ خطابت ہے

بہت الفاظ ہیں نادر بہت بے ساختہ جملے

ابھی تو لب کشائی آپ کی اپنی گواہی ہے

ابھی تو آپ ہیں ظل الہی آپ ہی کی بادشاہی ہے

ابھی تو علم وحکمت لفظ و گوہر آپ ہی کے ہیں

ابھی سب فیصلے سب مہر و محضر آپ ہی کے ہیں

ابھی سب زر،جواہر مال و دولت آپ ہی کے ہیں

ابھی سب شہرت و اسباب شہرت آپ ہی کے ہیں

ابھی کیا ہے ابھی تو آپ کا جبروت لہجے میں آیا ہو گا

ابھی تو آپ ہی کے نطق و لب سے آپ کا قصہ بیاں ہو گا

ابھی تو محترم بس آپ ہیں خود اپنی نظروں میں

معظم، محتشم القاب ہیں خود اپنی نظروں میں

ابھی تو گونجتے اونچے سروں میں آپ ہی ہیں نغمہ خواں اپنے

سبھی لطف و کرم اپنے مکان و لامکاں اپنے

ابھی تو آپ ہی کہتے ہیں کتنا خوب کہتے ہیں

جو دل میں آئے کہتے ہیں جو ہو مطلوب کہتے ہیں

مگر جب آپ کی سیرت پہ ساری گفتگو ہو لے

تو یہ بھی یاد رکھیے گا ابھی تک ہم نہیں بولے

شاعر: پیرزادہ قاسم