کامیاب معلم ـ ابوالحسن ندوی

کامیاب معلم ـ ابوالحسن ندوی

(حوالہ ، نامعلوم)

معلمین کے انتخاب میں اس بات کو ضرور پیش نظررکھنا چاہیے کہ ان کا نہ صرف اخلاقی اثر ہو بلکہ ان کا ذہنی تفوق بھی قائم ہو ، وہ مسائل کو سمجھتے ہوں ، زندگی کے مسائل سے باخبر ہوں ، وہ زندگی کے کنارے نہ ہوں بلکہ بیچ مندھار میں ہوں ، وہ عہد گذشتہ کے انسان نہ ہوں ، بلکہ اسی عہد اور اسی دورکے انسان ہوں ، اگر ادب و شاعری اور فنون لطیفہ کا مسئلہ چھڑ جائے ، سیاسی مسئلہ موضوع بحث ہو،تو اس پر وہ آزادانہ رائے دے سکیں اور اپنی ناواقفیت کا نقش قائم کرسکیں ، اور ان کے دل ودماغ میں ایک چنگاری فروزاں ہو ،
وہ طالب علم کو اپنا جیسا بلکہ اپنے سے اچھا بنانا چاہتے ہوں ،ان کی غذا ، ان کی دوا ، ان کی دل کی تسکین اور ان کی زندگی کے لیے جواز ہی یہ ہو کہ وہ اپنے عقیدہ کو اپنے عزیز طلبہ ، اپنے لخت جگر جو ملت کے لخت جگر ہیں ، ان میں منتقل کردیں ـ ان کو اگر روکا جائے اور ان کے پاؤں میں بیڑیاں ڈال دی جائیں اور ان کی زباں پر مہر لگادی جائے ،پھر بھی وہ بیتاب ہوں ،اس بت خانہ میں اذان دینے اور اس صنم کدہ میں حق کی آواز بلند کرنے کے لیے ـ
اگر ہمارے اساتذہ ایسی بے چین روح اور ایسا بیتاب جذبہ اپنے اندر رکھتے ہیں ،اتنی غیر محدود صلاحیت کے مالک ہیں ،ان کا رشتہ تعلیم سے براہ راست ہے ـ تعلیم نے ان کے لیے کانوں میں اپنا راز کہا ہے ،اور خدا کی مدد سے ان کے ساتھ شامل ہے ،اور اپنے کو اس کا نمائندہ سجھتے ہیں ، تو وہ کامیاب معلم ہیں ـ ہزار آندھیاں چلیں ، الحاد کے طوفان اٹھیں ،کیسے کیسے زلزلے آئیں ،لیکن ان کا جلایا ہوا چراغ روش رہے ـ

جیسے اقبال نے کہا ہے ::
ہوا گو تیز وتند لیکن چراغ اپنا جلا رہا ہے
وہ مرددرویش جس کو حق نے دیے ہیں انداز خسروانہ

 

مفید ۔ جزاک اللہ خیرا، ایمانداری مسلمانوں کا ہی شعار تھا ۔ وقت کےساتھ ساتھ جہاں اورجگہ خرابیاں آئی ہیں ۔ وہاں درس و تدریس میں بھی آئی ہیں ۔ جو معلم اپنے پیشہ کوعزت نہیں دے سکتا اورنا ہی تکریم کرسکتا ہے ، مخلص نہیں ہے ـ اس کے علم سے معاشرہ میں کسی قسم کی تبدیلی آجائے ، ناممکن نہیں تومشکل ضرور ہے ـ اگرکہیں قابل معلمین نظر آتے ہیں تو وہ اللہ کی طرف سے ہے ـ کچھ نا کچھ خیر تو باقی رہناہے ـ