خطبہ حرم مدنی " سفرِ حج؛ تلبیہ سے تزکیہ تک" از ڈاکٹر عبد الباری بن عواض ثبیتی حفظہ اللہ 28 ذوالقعدہ 1447 ہجری

شفقت الرحمن نے 'خطبات الحرمین' میں ‏مئی 19, 2026 کو نیا موضوع شروع کیا

  1. شفقت الرحمن

    شفقت الرحمن ركن مجلس علماء

    شمولیت:
    ‏جون 27, 2008
    پیغامات:
    783
    فضیلۃ الشیخ ڈاکٹر عبد الباری بن عواض ثبیتی حفظہ اللہ نے مسجد نبوی میں 28 ذیقعدہ 1447ہجری کا خطبہ جمعہ " سفرِ حج؛ تلبیہ سے تزکیہ تک" کے عنوان پر ارشاد فرمایا ، جس میں انہوں نے کہا کہ حج محض چند ظاہری اعمال کا نام نہیں، بلکہ یہ ایک ایسا عظیم روحانی سفر ہے جو انسان کے دل، نیت اور کردار کو بدل دیتا ہے۔ انہوں نے واضح کیا کہ حاجی دنیا کی چمک دمک اور مشاغل کو چھوڑ کر اللہ تعالیٰ کی طرف متوجہ ہوتا ہے، اور اخلاص، تقویٰ اور سچی توبہ کے ساتھ اپنی زندگی کا نیا آغاز کرتا ہے۔ مزید انہوں نے فرمایا کہ حج کے ہر مرحلے احرام، طواف، سعی، وقوفِ عرفہ اور رمیِ جمرات میں ایک گہرا تربیتی پہلو پوشیدہ ہے، جو انسان کو تواضع، صبر، توکل اور استقامت جیسے اوصاف سکھاتا ہے۔ انہوں نے اس بات پر زور دیا کہ اصل فضیلت نہ مال و دولت میں ہے اور نہ ظاہری شکل و صورت میں، بلکہ اللہ تعالیٰ کے نزدیک عزت کا معیار تقویٰ ہے۔ دوسرے خطبے میں خطیب نے ذی الحجہ کے ابتدائی دس دنوں کی عظمت کو بیان کرتے ہوئے فرمایا کہ یہ ایام صرف حجاج کے لیے خاص نہیں، بلکہ تمام مسلمانوں کے لیے نیکیوں کے مواقع ہیں، جن میں عبادات کا اجر کئی گنا بڑھا دیا جاتا ہے۔ انہوں نے خاص طور پر یومِ عرفہ کی فضیلت بیان کی اور اس کے روزے کو دو سال کے گناہوں کا کفارہ قرار دیا۔آخر میں خطیبِ محترم نے جامع دعا کروائی۔
    پی ڈی ایف فارمیٹ میں پڑھنے یا پرنٹ کے لیے کلک کریں:
    https://drive.google.com/file/d/1mRIGsIeKvrKa-DDQmTKeZpFncKR5AwAd

    پہلا خطبہ:
    ہمہ قسم کی حمد اللہ تعالیٰ کے لیے جس نے اپنے حرمت والے گھر کا حج شریعت میں شامل فرمایا۔ میں اس کی عطا کردہ نعمتِ امن اور نعمتِ ایمان پر اس کی حمد بیان کرتا ہوں اور اس کا شکر ادا کرتا ہوں ۔ اور میں گواہی دیتا ہوں کہ اللہ تعالیٰ کے سوا کوئی معبودِ برحق نہیں، وہ اکیلا ہے، اس کا کوئی شریک نہیں، اسی نے مناسکِ حج کا طریقہ بیان کیا ہم پر اپنا احسانِ کامل فرمایا۔ اور میں گواہی دیتا ہوں کہ ہمارے سردار اور نبی محمد ﷺ اس کے بندے اور رسول ہیں، آپ سب سے بہتر حج اور عمرہ کرنے والے اور قیام کرنے والے ہیں، اللہ تعالیٰ آپ پر درود و سلام نازل فرمائے جب تک لبیک کہنے والے لبیک کہتے رہیں اور بیت الحرام کا طواف کرنے والے طواف کرتے رہیں۔

    بعد ازاں:

    میں آپ سب اور اپنے آپ کو تقویٰ اختیار کرنے کی وصیت کرتا ہوں؛ یہی زادِ راہ ہے، یہی نجات ہے، اور یہی قبولیت کا راز ہے۔ اللہ تعالیٰ کا فرمان ہے: (يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ) ’’اے ایمان والو! اللہ سے ڈرو جیسا کہ اس سے ڈرنے کا حق ہے، اور تمہیں موت آئے تو صرف اسلام کی حالت میں۔‘‘[آل عمران: 102]

    یہ بابرکت جماعتیں زمین کے دور دراز کناروں سے حاضر ہوئی ہیں، انہیں سچے شوق نے کھینچا ہے، اور بڑی بڑی امیدیں ان کی رہنمائی کر رہی ہیں؛ وہ ایسی بخشش کی امید رکھتی ہیں جو گناہوں کو دھو ڈالے، ایسی مغفرت کی آرزو رکھتی ہیں جو خطاؤں کو مٹا دے، اور ایسی رحمت کی طلب گار ہیں جو دلوں کے زخموں پر مرہم رکھ دے۔ وہ اپنے بوجھوں سے لدی ہوئی آئی ہیں، اپنے سینوں میں گناہوں اور فکر و غم کا بوجھ اٹھائے ہوئے ایک عظیم رب کی طرف متوجہ ہیں ، ان میں سے ہر ایک کا دل کرمِ الہی پر کامل یقین رکھتا ہے، اور جانتا ہے کہ جو اس کا متلاشی وہ رد نہیں کیا جاتا، اور جو اس سے امید رکھے وہ ناکام نہیں ہوتا۔

    وہ دنیا کے شور و ہنگامے اور اس کی چمک دمک کو پیچھے چھوڑ کر آئی ہیں، تاکہ پاکیزگی اور امید کی فضا میں کھڑی ہوں؛ اور جب امید سچی ہو تو انسان کو اللہ کی بخشش کے دروازوں تک پہنچا دیتی ہے۔

    حج کا یہ سفر قدموں کی گنتی یا مناسک کی تعداد سے نہیں ناپا جاتا، بلکہ اس تقویٰ سے ناپا جاتا ہے جو دلوں میں پیدا ہوتا ہے؛ چنانچہ خوش نصیب ہے وہ شخص جو اپنے آنے میں سچا ہو، اپنی دعا میں مخلص ہو، اپنے رب کے سامنے کھڑے ہونے کو خوبصورت بنائے، اور اس سفر کو ایک نئے عہد کی ابتدا بنا دے جس میں گناہوں کے صفحات لپیٹ دیے جائیں۔

    رسول اللہ ﷺ نے ارشاد فرمایا: (مَنْ حَجَّ للهِ فَلَمْ يَرْفُثْ وَلَمْ يَفْسُقْ، رَجَعَ كَيَوْمٍ وَلَدَتْهَ أُمُّهُ)’’جو شخص اللہ کے لیے حج کرے، نہ فحش کلامی کرے اور نہ گناہ کا ارتکاب کرے، وہ اس دن کی طرح لوٹتا ہے جس دن اس کی ماں نے اسے جنا تھا۔‘‘ (بخاری، مسلم)

    حج کا سفر احرام سے شروع ہوتا ہے، تو حاجی اپنے کپڑے اتار دیتا ہے، گویا ان کے ساتھ وہ دنیا کے بوجھ اور فکریں بھی اتار دیتا ہے جو اس کے نفس سے وابستہ تھیں؛ چنانچہ وہ ظاہراً بھی بے تکلف ہو جاتا ہے اور باطناً بھی تکبر، ریا اور فخر و مباہات سے پاک ہو جاتا ہے، اور ان مبارک مقامات میں اللہ کے سوا ہر تعلق کو چھوڑ دیتا ہے۔

    حجاج ایک ہی لباس میں کھڑے ہوتے ہیں، تو فرق مٹ جاتے ہیں، رکاوٹیں ختم ہو جاتی ہیں، اور امتِ واحدہ کا معنی نہایت خوبصورت انداز میں ظاہر ہوتا ہے۔ اور محترم حاجی! آپ بھی اسی عظیم امت کے ایک فرد ہو؛ ایسی امت جو اپنی وحدت میں عظیم ہے، اپنی تاریخ میں مضبوط ہے، اور اپنی اقدار میں بلند ہے؛ ایک ایسی امت جس کے افراد ایک عقیدہ، ایک قبلہ اور ایک رب پر متحد ہیں۔

    اس امت کے افراد یہ سیکھتے ہیں کہ برتری نہ شکل و صورت میں ہے، نہ ظاہری مظاہر میں، اور نہ ہی مال و منصب میں، بلکہ اس ایمان میں ہے جو دلوں میں جاگزیں ہو، جس کی تصدیق نیتیں کریں، اور جس کا اظہار اعمال کریں۔ اللہ تعالیٰ کا فرمان ہے: (إِنَّ أَكْرَمَكُمْ عِنْدَ اللَّهِ أَتْقَاكُمْ)’’بے شک تم میں اللہ کے نزدیک سب سے زیادہ معزز وہ ہے جو سب سے زیادہ متقی ہے۔‘‘[الحجرات: 13]

    پھر حاجی اپنی آواز بلند کرتا ہے: ’’لَبَّيْكَ اَللَّهُمَّ لَبَّيْكَ‘‘ایک ایسا کلمہ جو پوری زندگی کے مفہوم کو سمیٹ لیتا ہے؛ گویا وہ کہہ رہا ہو: اے میرے رب! میں حاضر ہوں، تیرے حکم پر لبیک کہتے ہوئے، اور تیرے سوا ہر چیز کو چھوڑ کر تیری طرف پوری طرح متوجہ ہوں۔

    یہ تلبیہ زبان پر صدا بن کر گونجتا ہے اور دل میں معنی بن کر اترتا ہے، اسے جگاتا ہے، سنوارتا ہے؛ پھر یہی معانی زندگی کے رویّوں میں ڈھل جاتے ہیں: نماز میں خشوع بن کر، کام میں دیانت بن کر، معاملات میں سچائی بن کر، اور زندگی کی راہ میں استقامت بن کر۔

    پھر حاجی طواف شروع کرتا ہے، بیت اللہ کے گرد چکر لگاتا ہے، مگر اس کے ساتھ اس کے دل میں بڑے معانی بھی گردش کرتے ہیں؛ اب اس کا دل نہ اپنی خواہش کے گرد گھومتا ہے، نہ مال کے، نہ خواہشاتِ نفس کے، نہ لوگوں کی رضا کے، بلکہ صرف اللہ کی رضا کے گرد۔ گویا طواف اس کی زندگی کی سمت کو ازسرِ نو متعین کرتا ہے اور اسے سکھاتا ہے کہ اپنی غایت اللہ کو بنائے، اور پوری زندگی کو اسی کی مرضی کے گرد گھمائے۔

    پھر حاجی صفا و مروہ کے درمیان سعی کرتا ہے، سیدہ ہاجرہ علیہا السلام کی سعی کو یاد کرتے ہوئے جب وہ ایک ایسی وادی میں تھیں جہاں نہ کھیتی تھی نہ پانی، مگر ان کا تعلق اللہ سے تھا؛ وہ جسمانی طور پر دوڑ رہی تھیں لیکن ان کا دل اپنے رب پر مطمئن تھا۔ اس طرح حاجی یہ سبق سیکھتا ہے کہ اسباب اختیار کرے مگر اسباب کا اسیر نہ بنے، زمین پر جدوجہد کرے مگر اس کا دل آسمان کے رب سے وابستہ رہے۔

    پھر عرفہ کا دن آتا ہے ایک ایسا دن جس کے لیے دل بے قرار رہتے ہیں، جہاں انسان اپنے آپ سے سچی ملاقات کرتا ہے؛ اپنی کمزوری دیکھتا ہے، اپنی کوتاہیوں کو یاد کرتا ہے، اپنے گناہوں کو سامنے لاتا ہے، اور پھر اپنے رب کے حضور ٹوٹ جاتا ہے؛ آنکھوں سے خشیت اور امید کے آنسو بہتے ہیں، اور اسے یقین ہوتا ہے کہ اللہ کا دروازہ کبھی بند نہیں ہوتا، اور اس کی رحمت ہمارے گناہوں سے کہیں زیادہ وسیع ہے؛ کیونکہ جو سچی توبہ کے ساتھ لوٹ آئے، اللہ اس کے لیے قبولیت کے دروازے کھول دیتا ہے۔

    پھر حاجی جمرات کو کنکریاں مارتا ہے، گویا اپنے ساتھ ان گناہوں کو بھی رمی کر رہا ہوتا ہے جن کا وہ عادی ہو چکا تھا، اور ان حرام عادات کو بھی جنہیں اس نے اپنا لیا تھا، اور اس طویل شیطانی غفلت کو بھی؛ یوں وہ یہ عزم کرتا ہے کہ اب گناہ کی طرف واپسی کا راستہ کاٹ دے گا، اور استقامت و مجاہدہ کی راہ اختیار کرے گا۔

    اور ازدحام کے دوران جب لوگ اسے دھکے دیتے ہیں یا کوئی اس کے ساتھ زیادتی کر بیٹھتا ہے، تو وہ صبر اور حلم کا درس لیتا ہے، اپنی زبان کو قابو میں رکھتا ہے، اپنے غصے کو پی جاتا ہے؛ اللہ تعالیٰ کے اس فرمان کی تعمیل میں:
    (فَلَا رَفَثَ وَلَا فُسُوقَ وَلَا جِدَالَ فِي الْحَجِّ) ’’پس حج میں نہ کوئی بے حیائی کی بات ہو، نہ نافرمانی، اور نہ جھگڑا۔‘‘ [البقرة: 197] پھر حاجی اسی اخلاق کو اپنی پوری زندگی میں لے آتا ہے؛ اپنے گھر میں، اپنے کام میں، اپنے معاملات میں، بلکہ اپنے ہر معاملے میں۔

    یوں حج ایک ربانی اور ایمانی تربیتی کیمپ بن جاتا ہے، جہاں سے حاجی اس حال میں لوٹتا ہے کہ وہ تقویٰ کا زادِ راہ لے چکا ہوتا ہے، اس کا نفس پاکیزہ ہو چکا ہوتا ہے، اس کا دل نکھر جاتا ہے، اور اس کا اخلاق سنور جاتا ہے۔ اللہ تعالیٰ کا فرمان ہے: (لَنْ يَنَالَ اللَّهَ لُحُومُهَا وَلَا دِمَاؤُهَا وَلَكِنْ يَنَالُهُ التَّقْوَى مِنْكُمْ) ’’اللہ تک نہ ان (قربانیوں) کا گوشت پہنچتا ہے اور نہ ان کا خون، بلکہ اس تک تمہارا تقویٰ پہنچتا ہے۔‘‘[الحج: 37]

    میں اسی پر اکتفا کرتا ہوں، اور اللہ تعالیٰ سے اپنے لیے، آپ سب کے لیے، اور تمام مسلمانوں کے لیے ہر گناہ کی مغفرت طلب کرتا ہوں؛ پس تم بھی اسی سے مغفرت طلب کرو، بے شک وہی غفور و رحیم ہے۔


    دوسرا خطبہ:
    ہمہ قسم کی حمد اللہ تعالیٰ کے لیے، جس نے اپنے بندوں کو فضل والے موسم عطا فرمائے۔ میں اس کی حمد بیان کرتا ہوں اور اس کا شکر ادا کرتا ہوں، وہی پیدا کرتا ہے اور اسی کا اختیار ہے۔ اور میں گواہی دیتا ہوں کہ اللہ تعالیٰ کے سوا کوئی معبودِ برحق نہیں، وہ اکیلا ہے، اس کا کوئی شریک نہیں۔ اللہ تعالیٰ کا فرمان ہے: (وَالْفَجْرِ * وَلَيَالٍ عَشْرٍ) [الفجر: 1-2] ’’قسم ہے فجر کی، اور دس راتوں کی۔‘‘ اور میں گواہی دیتا ہوں کہ ہمارے سردار اور نبی محمد ﷺ اس کے بندے اور رسول ہیں، آپ ان دس دنوں کی عظمت کو سب سے زیادہ جاننے والے تھے، اللہ تعالیٰ آپ پر درود و سلام نازل فرمائے جب تک رات اور دن ایک دوسرے کے پیچھے آتے رہیں اور خیر کے موسم ان دس دنوں سے مزین ہوتے رہیں۔

    بعد ازاں:

    میں آپ سب اور اپنے آپ کو تقویٰ اختیار کرنے کی وصیت کرتا ہوں۔

    اللہ تعالیٰ کی اپنے بندوں پر یہ رحمت ہے کہ اس نے خیر کو صرف حجاج کے ساتھ خاص نہیں کیا، بلکہ اس خیر کے دروازے سب کے لیے کھول دیے؛ چنانچہ ذی الحجہ کے یہ دس دن عظیم دن ہیں، جن کی اللہ تعالیٰ نے قسم کھائی ہے: (وَالْفَجْرِ * وَلَيَالٍ عَشْرٍ) [الفجر: 1-2] اور اللہ تعالیٰ کی قسم اس چیز کی عظمت پر دلالت کرتی ہے۔

    یہ ایسے دن ہیں جن میں اجر کئی گنا بڑھا دیا جاتا ہے، رحمتیں نازل ہوتی ہیں؛ ان دنوں میں نماز ہے، روزہ ہے، ذکر ہے، صدقہ ہے، تکبیر ہے گویا عبادات کی تمام صورتیں ان میں جمع ہو جاتی ہیں، اور یوں محسوس ہوتا ہے جیسے ایک کھلی دعوت ہو کہ: عبادت کرو اور قربت پاؤ۔

    اسی سلسلے میں رسول اللہ ﷺ نے ارشاد فرمایا: (مَا مِنْ أَيَّامٍ اَلْعَمَلُ الصَّالِحُ فِيْهَا أَحَبُّ إِلَى اللهِ مِنْ هَذِهِ الْأَيَّامِ» يَعْنِيْ أَيَّامَ الْعَشْرِ، قَالُوْا: يَا رَسُوْلَ اللهِ، وَلَا الْجِهَادُ فِيْ سَبِيْلِ اللهِ؟ قَالَ: «وَلَا الْجِهَادُ فِيْ سَبِيْلِ اللهِ، إِلَّا رَجُلٌ خَرَجَ بِنَفْسِهِ وَمَالِهِ فَلَمْ يَرْجِعْ مِنْ ذَلِكَ بِشَيْءٍ)’’کوئی دن ایسے نہیں جن میں نیک عمل اللہ کو ان دس دنوں سے زیادہ محبوب ہو‘‘ ۔ صحابہ نے عرض کیا: یا رسول اللہ! کیا اللہ کے راستے میں جہاد بھی نہیں؟ آپ ﷺ نے فرمایا: ’’جہاد بھی نہیں، سوائے اس شخص کے جو اپنی جان اور مال کے ساتھ نکلا اور پھر کچھ بھی واپس نہ آیا۔‘‘ (بخاری)

    اور ان دنوں میں سب سے عظیم دن عرفہ کا دن ہے جو کہ مغفرت کا دن، ایسا دن جس میں اللہ تعالیٰ گناہوں کو مٹا دیتا ہے۔

    نبی کریم ﷺ نے ارشاد فرمایا: ( صِيَامُ يَوْمِ عَرَفَةَ أَحْتَسِبُ عَلَى اللهِ أَن يُّكَفِّرَ السَّنَةَ الَّتِيْ قَبْلَهُ وَالسَّنَةَ الَّتِيْ بَعْدَهُ) ’’میں اللہ سے امید رکھتا ہوں کہ یومِ عرفہ کا روزہ پچھلے ایک سال اور آنے والے ایک سال کے گناہوں کا کفارہ بن جاتا ہے۔‘‘ (مسلم)

    دو سال کے گناہوں کا کفارہ کتنا بڑا اجر، اور وہ بھی ایک آسان عمل پر! چنانچہ اپنے آپ کو اس عظیم اجر سے محروم نہ کریں، اپنی توبہ میں تاخیر نہ کریں، اور اس موقع کو ضائع نہ ہونے دیں؛ زندگی محدود ہے، دن گزرتے جا رہے ہیں، کتنے ہی لوگ ارادہ کرتے ہیں مگر عمل نہیں کر پاتے، چنانچہ اللہ کی طرف متوجہ ہو کر فوری عمل کرنے والا خوش نصیب ہے۔

    آپ اللہ کے بہترین بندے اور سب سے افضل مخلوق جناب محمد بن عبد اللہ ﷺ پر درود و سلام بھیجیں۔

    یا اللہ! آپ ﷺ پر درود و سلام اور برکتیں نازل فرما، جتنی بار آپ کا ذکر کرنے والے آپ کا ذکر کریں، اور جتنی بار غافل لوگ آپ کے ذکر سے غفلت برتیں؛ اور یا اللہ! آپ پر اولین و آخرین میں اور ملأ اعلیٰ میں قیامت کے دن تک رحمتیں نازل فرما۔

    یا اللہ! ہمیں آپ ﷺ کی شفاعت نصیب فرما، اور آپ کی پیروی کی توفیق عطا فرما، اور ہمیں آپ کی سنت پر چلنے والوں میں شامل فرما۔

    یا اللہ! خلفائے راشدین ابوبکر، عمر، عثمان اور علی رضی اللہ عنہم سے راضی ہو جا، اور اہلِ بیت اور تمام صحابۂ کرام سے بھی، اور ہمیں بھی اپنی معافی کے صدقے ان کے ساتھ شامل فرما، یا اکرم الاکرمین!

    یا اللہ! اسلام اور مسلمانوں کو غلبہ عطا فرما، یا اللہ! اسلام اور مسلمانوں کو غلبہ عطا فرما، یا اللہ! اسلام اور مسلمانوں کو غلبہ عطا فرما، ہمارے حالات درست فرما، اور ہمیں حق اور ہدایت پر جمع فرما۔

    یا اللہ! مسلمانوں کے ممالک کی حفاظت فرما، اور فلسطین میں اور ہر جگہ ان کے لیے مددگار، ناصر اور پشت پناہ بن جا۔

    یا اللہ! جو کوئی ہمیں اور مسلم ممالک کو نقصان پہنچانے کا ارادہ کرے، تو اسے اپنی جان کے لالے پڑ جائیں، اور اس کی تدبیر کو اسی کی تباہی بنا دے، یا سمیع الدعاء! اس کی چال کو اسی کے گلے میں ڈال دے۔

    یا اللہ! ہمارے ملک کی حفاظت فرما—یہ بابرکت سرزمین جو ایمان کا مرکز اور مسلمانوں کے دلوں کا محور ہے—اسے ہر برائی سے محفوظ فرما، اس پر امن و استحکام کی نعمت کو قائم فرما، اس کے محافظوں کی حفاظت فرما، اور اس خلاف سازشیں کرنے والوں کی سازش، مکاروں کی چال اور دشمنوں کے حملوں کو پسپا فرما۔

    یا اللہ! ہم تجھے ان کے مقابلے میں پیش کرتے ہیں اور ان کی برائیوں سے تیری پناہ چاہتے ہیں، اور تمام مسلم ممالک میں خیر، خوش حالی اور سعادت کو عام فرما، اور انہیں امن و استحکام کا لبادہ پہنا ۔

    یا اللہ! ہمارے دلوں کی اصلاح فرما، ہمارے نفسوں کو پاک کر دے، اور ہمیں سیدھے راستے کی ہدایت عطا فرما۔ یا اللہ! ہماری کوششوں کو اپنی رضا کے لیے بنا دے اور ہمیں اس کام کی توفیق عطا فرما جو تجھے پسند ہے۔

    یا اللہ! ہم سے قبول فرما، ہمیں بخش دے، ہم پر رحم فرما۔ یا اللہ! اپنے گھر کے حجاج کی حفاظت فرما، انہیں برائیوں اور گناہوں سے بچا، یا اللہ! ان کا حج قبول فرما، ان کی سعی کو مقبول بنا، ان کے گناہوں کو بخش دے، ان کے اعمال کو قبول فرما، اور انہیں اپنے گھروں کو سلامت، کامیاب اور اجر پانے والے بنا کر واپس لوٹا۔

    یا اللہ! ہمارے حکمران خادم حرمین شریفین کو اس کام کی توفیق دے جو تجھے پسندیدہ ہوں، اور ان کے ولی عہد کو بھی اس کام کی توفیق دے جس میں ملک و ملت کی بھلائی ہو، اور تمام مسلمانوں کے حکمرانوں کو ہر بھلائی کی توفیق عطا فرما، یارب العالمین!

    (رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ) ’’اے ہمارے رب! ہمیں دنیا میں بھی بھلائی عطا فرما، آخرت میں بھی بھلائی عطا فرما، اور ہمیں آگ کے عذاب سے بچا۔‘‘[البقرة: 201]

    (إِنَّ اللَّهَ يَأْمُرُ بِالْعَدْلِ وَالْإِحْسَانِ وَإِيتَاءِ ذِي الْقُرْبَى وَيَنْهَى عَنِ الْفَحْشَاءِ وَالْمُنْكَرِ وَالْبَغْيِ يَعِظُكُمْ لَعَلَّكُمْ تَذَكَّرُونَ) ’’بے شک اللہ عدل، احسان اور قرابت داروں کو دینے کا حکم دیتا ہے، اور بے حیائی، برائی اور زیادتی سے منع کرتا ہے۔ وہ تمہیں وعظ کرتا ہے تاکہ تم نصیحت حاصل کرو۔‘‘[النحل: 90]

    تم اللہ کو یاد کرو، وہ تمہیں یاد رکھے گا۔ اس کی نعمتوں پر شکر ادا کرو، وہ تمہیں اور زیادہ عطا فرمائے گا۔ اور یقیناً اللہ کا ذکر سب سے بڑی عبادت ہے، اور اللہ خوب جانتا ہے جو کچھ تم کرتے ہو۔
     
Loading...

اردو مجلس کو دوسروں تک پہنچائیں