میں آپ سے تین باتیں پوچھتا ہوں جو کہ نبی کے علاوہ کوئی نہیں جانتا

سیدنا انس بن مالک رضی اللہ عنہ سے مروی ہے کہ
نبی صلی اللہ علیہ وسلم کی مدینہ منورہ تشریف آوری کے بعد
سیدنا عبداللہ بن سلام رضی اللہ عنہ بارگاہ رسالت میں حاضر ہوئے
اور کہنے لگے
یا رسول اللہ صلی اللہ علیہ وسلم ! میں آپ سے تین باتیں پوچھتا ہوں
جنہیں کسی نبی کے علاوہ کوئی نہیں جانتا،
نبی صلی اللہ علیہ وسلم نے فرمایا پوچھو،
انہوں نے کہا کہ قیامت کی سب سے پہلی علامت کیا ہے؟
اہل جنت کا سب سے پہلا کھانا کیا چیز ہوگی؟
اور بچہ اپنے ماں باپ کے مشابہہ کیسے ہوتا ہے؟
نبی صلی اللہ علیہ وسلم نے فرمایا ان کا جواب مجھے
ابھی ابھی جبرئیل امین علیہ السلام نے بتایا ہے،
سیدنا عبداللہ رضی اللہ عنہ کہنے لگے
وہ تو فرشتوں میں یہودیوں کا دشمن ہے۔
نبی صلی اللہ علیہ وسلم نے فرمایا
قیامت کی سب سے پہلی علامت تو وہ آگ ہوگی
جو مشرق سے نکل کر تمام لوگوں کو مغرب میں جمع کرلے گی،
اور اہل جنت کا سب سے پہلا کھانا مچھلی کا جگر ہوگا،
اور بچے کے اپنے ماں باپ کے ساتھ مشابہہ ہونے کی وجہ یہ ہے
کہ اگر مرد کا " پانی''عورت کے پانی پر غالب آجائے
تو وہ بچے کو اپنی طرف کھینچ لیتا ہے
اور اگر عورت کا پانی مرد کے پانی پر غالب آجائے
تو وہ بچے کو اپنی طرف کھینچ لیتی ہے،
یہ سن کر سیدنا عبداللہ رضی اللہ عنہ کہنے لگے کہ
میں اس بات کی گواہی دیتا ہوں کہ اللہ کے علاوہ کوئی معبود نہیں
اور آپ اللہ کے رسول ہیں ،
پھر کہنے لگے یا رسول اللہ صلی اللہ علیہ وسلم !
یہودی بہتان باندھنے والی قوم ہیں ، اگر انہیں میرے اسلام کا پتہ چل گیا
تو وہ آپ کے سامنے مجھ پر طرح طرح کے الزام لگائیں گے،
اس لئے آپ ان کے پاس پیغام بھیج کر انہیں بلائیے
اور میرے متعلق ان سے پوچھئے کہ تم میں ابن سلام کیسا آدمی ہے؟
چنانچہ نبی صلی اللہ علیہ وسلم نے انہیں بلا بھیجا، اور ان سے پوچھا
کہ عبداللہ بن سلام (رضی اللہ عنہ) تم میں کیسا آدمی ہے؟
انہوں نے جواب دیا کہ ہم میں سب سے بہتر ہے اور سب سے بہتر کا بیٹا ہے،
ہمارا عالم اور عالم کا بیٹا ہے، ہم میں سب سے بڑا فقیہہ ہے
اور سب سے بڑے فقیہہ کا بیٹا ہے،
نبی صلی اللہ علیہ وسلم نے فرمایا
یہ بتاؤ، اگر وہ اسلام قبول کر لے تو کیا تم بھی اسلام قبول کر لو گے؟
وہ کہنے لگے اللہ اسے بچا کر رکھے،
اس پرسیدنا عبداللہ بن سلام رضی اللہ عنہ باہر نکل آئے
اور ان کے سامنے کلمہ پڑھا،
یہ سن کر وہ کہنے لگے کہ یہ ہم میں سب سے بدتر ہے
اور سب سے بدتر کا بیٹا ہے
اور ہم میں جاہل اور جاہل کا بیٹا ہے،
سیدنا عبداللہ بن سلام رضی اللہ عنہ نے فرمایا اسی چیز کا مجھے اندیشہ تھا۔
مسند احمد:جلد پنجم:حدیث نمبر 1055
سیدنا انس بن مالک رضی اللہ عنہ کی مرویات
صحیح بخاری میں بھی یہ روایت موجود ہے
​

 

جزاک اللہ و بارک اللہ فی جہودک المبارکہ
بھائی بہت ہی بہترین حدیث شئیر کی ہمیشہ کی طرح۔
اللہ ہم سے دین کا مزید کام لے۔ آمین

 

جزاک اللہ خیرا بھائ عبد الرحمن یحیی۔

 

جزاک اللہ خیرا

 

جزاک اللہ خیرا